
A conselleira de Medio Ambiente e Cambio Climático, Ángeles Vázquez, visitou hoxe as instalacións da Compañía Española de Algas Mariñas (Ceamsa) con motivo da súa adhesión á Alianza Galega polo Clima, onde destacou que estas grandes empresas que apostan pola innovación e comprometidas co medio ambiente son un modelo a imitar polas máis pequenas na posta en marcha de accións para facer fronte ao quecemento global.
A responsable autonómica subliñou que o compromiso deste tipo de firmas coas boas prácticas ambientais é vital para que exerzan un efecto tractor no tecido empresarial da súa contorna e que outras compañías coas que manteñen relacións comerciais acaben replicando o seu modelo en beneficio da situación medioambiental da comunidade.
Ademais, incidiu, estas adhesións reforzan un foro no que os principais axentes económicos e sociais de Galicia crean sinerxías e avanzan no coidado do medio ambiente mediante o desenvolvemento de prácticas sostibles na súa operativa diaria coas que reducir a pegada de carbono.
Neste sentido, a Alianza Galega polo Clima conta xa con preto de 200 entidades adheridas entre as que se atopan empresas, as tres universidades galegas, as cinco autoridades portuarias da comunidade, clústeres, fundacións, organizacións non gubernamentais, clubs deportivos ou colexios profesionais.
O seu labor é fundamental para que Galicia cumpra co seu obxectivo de acadar a neutralidade climática en 2040 e continuar coa boa evolución nos últimos anos, nos que a comunidade reduciu as emisións netas de gases de efecto invernadoiro un 19,5%, o triplo que o conxunto de España (6%) e que o conxunto da Unión Europea (6,1%).
A empresa
Ceamsa fundouse no ano 1966 para dedicarse á fabricación de texturizantes e estabilizantes para as industrias de alimentación, bebidas, farmacéutica e nutracéutica. Trátase dunha compañía de marcado carácter internacional pois o 90% das súas vendas teñen como destino 90 países dos cinco continentes, motivo polo que conta con filiais en países como Filipinas, China, Estados Unidos ou India.
Esta empresa, referente en I+D+i, conta con preto de medio milleiro de traballadores e no desenvolvemento da súa actividade ten presente a adopción de medidas para reducir a pegada de carbono e está adherida tamén ao Pacto Mundial de Nacións Unidas para contribuír aos Obxectivos de Desenvolvemento Sostible.